កំណាព្យ

ស្រឡាញ់ស្ទើរតែលេប

ឱ ! កែវនិមល	ចិត្តបងខ្វាយខ្វល់	ព្រោះតែនឹកស្រី
បងស្ទើរតែឆ្កួត	ភ្លឹកស្មារតី	ចង់ប្រាប់ពិសី
	ថាបងស្រឡាញ់ ។
ចង់ស្រែកឱ្យលាន់	ឱ្យបានរាប់ពាន់	ពាក្យថាស្រឡាញ់
រូបអូនស្អាតណាស់	សក់រួញអង្កាញ់	បងសូមស្រឡាញ់
	តែអូនមួយនាក់ ។
ជួនកាលបងខឹង	ពេលកែវព្រលឹង	មានប្រុសរាក់ទាក់
បងប្រច័ណ្ឌអូន	តែរូបស្រីម្នាក់	បងសូមរួមរ័ក
	លុះអវសាន ។
ទោះកើតជាតិណា	បងសូមប្រាថ្នា	ជួបកែវកល្យាណ
គ្រប់ភពគ្រប់ជាតិ	ផ្ញើជីវិតប្រាណ	សូមឱ្យបងបាន
	ជួបតែពៅស្រី ។
ពេលអូនស្ងាត់ឈឹង	បងព្រួយទន្ទឹង	មើលតែផ្លូវស្រី
ថាតើរូបអូន	សុខទុក្ខឬអ្វី ?	បងស្ទើរតែក្ស័យ
	ព្រោះតែព្រួយអូន ។
សូមអូនមេត្តា	ទៅណាមកណា	រក្សាថែខ្លួន
ឱ្យដំណឹងផង	តាមអ៊ិ-មេលអូន	កុំភ្លេចណាស្ងួន
	ព្រោះបងទន្ទឹង ។
ដោយៈ ឈន់ សុទ្ធិពង្ស